Tra-tehaky ny zandary any Moramanga, tao Ambodimanga, Sabotsy Anjiro, eo amin’ny PK 77 amin’iny lalam-pirenena faha-2 iny ny alarobia faha-29 desambra teo, vao maraina be, ny toaka gasy 240 litatra.

Bidons miisa 12 nafenina teo anelanelan’ny gonin-katsaka sy kafe milanja 8 taonina avy any Vatomandry ireto zavapisotro mahamamo saika nikendrena ny fetin’ny taom-baovao ireto.

Nosamborina ny lehilahy iray avy any Manjakandriana, izay nitonona ho tompon’ny entana.

Notanana natao famotorana izy eo am-piandrasana ny fanolorana azy amin’ny fampanoavana eny amin’ny fitsarana.

Notanana sy nampidirina am-balampamonjana ihany koa ny fiarabe nitondra ny entana.

Marihina fa anisan’ireo misondro-bidy hatrany ihany koa ny toaka gasy izay miteraka tombony lehibe ho an’ny mpijirika ny famarotana azy.

Balita Raharisoa