Tafaverina an-tanindrazana ny sabotsy 11 febroary 2023 ny filoha teo aloha Hery Rajaonarimampianina, rehefa tsy teto nandritra ny efa-taona, ho fanajana ny fenitra Repoblikana, namelana ny mpandimby azy teo amin’ny fitondrana hiasa malalaka, araka ny nambarany.

Tamin’ny lahateny fohy nataony teny amin'ny foiben-toeran'ny antoko HVM, teny Andraharo, no nilazany fa mila fitoniana i Madagasikara, hisian'ny fampandrosoana, ary fitiavan-tanindrazana no nanesika azy hiverina.

Nambarany hitety faritra izy hijery, hihaino ary hiresaka amin’ny vahoaka, hitondra fanantenana vaovao.

Nofoanana moa ny fitsenana azy teny amin'ny seranam-piaramanidina Ivato. Nisy kosa ireo filohan'antoko sy solontena amin’ny fanoherana tonga nanotrona ny fahatongavany teny Andraharo, niaraka tamin’ireo mpikatroka HVM, notarihin'ny birao foibe.